នាយនគរបាលប៉ុស្តិ៍អូររលែដែលជាអ្នកបាញ់សម្លាប់មនុស្សទាំង៣នាក់ នៅស្រុកអូររាំង ខេត្តមណ្ឌលគិរី បានបញ្ជូនមកដល់ក្រសួងមហាផ្ទៃ ដើម្បីធ្វើការសួរចម្លើយ

(ភ្នំពេញ)៖ ប្រធាននាយកដ្ឋាននគរបាលព្រហ្មទណ្ឌ ក្រសួងមហាផ្ទៃ លោកឧត្តមសេនីយ៍ឯក សុខ ខេមរិន បានប្រាប់អ្នកសារព័ត៌មាន ឲ្យដឹងថា ជនដៃដល់ដែលជា​នាយនគរបាលប៉ុស្តិ៍អូររលែ ផល ពេញ ដែលបាញ់សម្លាប់ជនរងគ្រោះទាំង៣នាក់ នៅស្រុកអូររាំង ខេត្តមណ្ឌលគិរី នៅវេលាម៉ោងជាង១រសៀលថ្ងៃទី០២ ខែកុម្ភៈ ឆ្នាំ២០១៨នេះ បានបញ្ជូនមកដល់ក្រសួងមហាផ្ទៃហើយ ដើម្បីធ្វើការសួរនាំ រួចហើយទើបបញ្ជូនទៅខេត្តមណ្ឌលគិរីវិញ។

សូមជម្រាបថា នាយនគរបាលប៉ុស្តិ៍អូររលែ ផល ពេញ បានសារភាពប្រាប់សមត្ថកិច្ចហើយថា រូបគេគឺជាអ្នកបាញ់សម្លាប់ជនរងគ្រោះទាំង៣នាក់ ពិតប្រាកដមែន ដោយផ្តើមចេញពីការទាស់ទែងគ្នា។ នេះបើតាមលោកឧត្តមសេនីយ៍ត្រី សូ សុវណ្ណ ស្នងការរងនគរបាលទទួលផែនព្រហ្មទណ្ឌ ខេត្តមណ្ឌលគីរី ដែលបានសួរចម្លើយជនដៃដល់ បន្ទាប់ពីចាប់ខ្លួននៅព្រឹកថ្ងៃទី២ ខែកុម្ភៈ ឆ្នាំ២០១៨នេះ។​

លោកឧត្តមសេនីយ៍ត្រី សូ សុវណ្ណ បានប្រាប់អ្នកសារសារព័ត៌មាននៅមុននេះបន្តិចថា «ជននេះបានសារភាពហើយ គឺជាអ្នកបាញ់សម្លាប់ជនរងគ្រោះទាំង៣នាក់មែន ដោយគាត់ថា មកពីមានគំនុំ និងឈ្លោះជាមួយគ្នា»។

យ៉ាងណាក៏ដោយ លោកឧត្តមសេនីយ៍ត្រី សូ សុវណ្ណ មិនអាចបញ្ជាក់ឲ្យលម្អិត ចំពោះដំណើររឿងពាក់ព័ន្ធការទាស់ទែងគ្នានោះឡើយ។

យ៉ាងណាក៏ដោយ តាមសេចក្តីរាយការណ៍ និងព័ត៌មាន ដែលទទួលបានរហូតមកដល់ពេលនេះ គឺជាប់ពាក់ព័ន្ធនឹងបទល្មើសព្រៃឈើ។

សូមបញ្ជាក់ថា ជនដៃដល់ជានាយនគរបាលប៉ុស្តិ៍អូររលែរូបនេះ ត្រូវបានកម្លាំងនគរបាលខេត្តមណ្ឌលគិរី សហការជាមួយ កម្លាំងនគរបាលនាយកដ្ឋានព្រហ្មទណ្ឌ ក្រសួងមហាផ្ទៃ និងកម្លាំងនគរបាលស្រុកមេមត់ ខេត្តត្បូងឃ្មុំ បានចាប់ខ្លួន​នាព្រឹកថ្ងៃទី២ ខែកុម្ភៈ ឆ្នាំ២០១៨នេះ នៅក្នុងស្រុកមេមត់ ខេត្តត្បូងឃ្មុំ ខណៈជនដៃដល់រូបនេះ កំពុងធ្វើដំណើររត់គេចខ្លួនទៅស្រុកកំណើត ឯខេត្តព្រៃវែង។ ជនដៃដល់ត្រូវបានចាប់ខ្លួន នៅពេលកំពុងចូលហូបគុយទាវ នៅហាងឥន្ទ្រី។

គិតត្រឹមយប់មិញ មន្រ្តីយោធាការពារព្រំដែន៣នាក់ និងមន្រ្តីនគរបាលការពារព្រំដែនម្នាក់ ត្រូវបានចាប់ខ្លួនជាបន្តបន្ទាប់ ពាក់ព័ន្ធការបាញ់សម្លាប់មនុស្ស៣នាក់ នៅស្រុកអូររាំង ខេត្តមណ្ឌលគិរី។

សូមបញ្ជាក់ថា ការបាញ់ប្រហារនេះបានកើតឡើងនៅចំណុចប៉ុស្ដិ៍អូររលែ ក្នុងភូមិសាស្ដ្រភូមិ​ពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី នៅចន្លោះម៉ោង៤ ទៅម៉ោង៥ល្ងាចថ្ងៃទី៣០ ខែមករា ឆ្នាំ២០១៨ បានបណ្ដាលឲ្យស្លាប់មនុស្ស៣នាក់ រួមមាន៖ មន្ដ្រីអាវុធហត្ថលើផ្ទៃប្រទេសម្នាក់ឈ្មោះ សេក វឌ្ឍនា, មន្ដ្រីឧទ្យានុរក្ស នៃមន្ទីរបរិស្ថានខេត្តមណ្ឌលគិរី ឈ្មោះ តើន សុខណៃ និងបុគ្គលិកអង្គការសមាគម អភិរក្សាសត្វព្រៃ Wildlife Conservation Society (WCS)ឈ្មោះ ថុល ខ្នា ដែលការបាញ់ប្រហារនេះផ្តើមចេញពីបទល្មើសព្រៃឈើ៕ដោយ៖Fresh News

 

Related Posts

About The Author

Add Comment

error: Content is protected !!